الله معك...
بيخَبرو عن صبيِّة توظَّفِت بمعمل خياطة، ولـمّا إستَلَمِت شغلها، شافِت ورقة معلَّقة ع كلّ آلات المعمل، وعالورقة مكتوب :
«بس يعَركِش الخيط معكُن طلبو رئيس العمّال».
تعجَّبِت هالموظَّفِة من هالكتابة، وهيّي وعم تشتغل تعركشِت معها خيطان الصوف جرَّبِت تحِلّ مشكلتها لوحدها، بس مع الأسف ما قدرِت، وبالعكس صارِت المشكلة تكبر وتتعقَّد، بالآخر ما ضَلّ عندها، إلّا تنفِّذ شو مكتوب على آلة الخياطة، وتُطلُب مُساعَدِة رئيس العمّال، ولـمّا وُصِل سألها :
«ليش ما إستدعَيتيني قبِل هلَّأ؟»
جاوَبِتو :
«جرَّبِت كِلّ قوتي بس ما قدِرت فِكّ الخيطان».
جاوَبها :
«أكيد ما إستعمَلتي كل قوتِك لأنِّك ما طلبتي ورايي».
الزوّادة بتقلّي وبتقلَّك :
«عند الصعوبة ما تتردَّد تطلُب مُساعدة يلّي هوّي أعلى مِنَّك بالمسؤولية ما تنسى الربّ هوّي المسؤول عنَّك وعن كلّ الناس».
المصدر : صوت المحبّة
