الله معك...
بيخَبرو عن عصفور بيحِبّ كتير يطير، بس كان عندو مشكلة وهيّي إنّو بيتعب بسرعة.
إستشار صاحبو، يَلّي نَصَحو يخفِّف من وزنو.
بسّ هالعصفور وبدَل ما يخفِّف من أكلو قرَّر يخفِّف من ريشات جوانحو، وصار يشيل ريشة قدّام ريشة حتّى لاقى وزنو صار معقول، وساعتها جرَّب يطير، بس ما قِدِر، لأنّو بالآخر صار بلا جوانح.
الزوّادة بتقلّي وبتقلَّك :
«نحنا هيك بعلاقتنا مع الله حابّين إنّو نطير ونوصَل لعندو، بسّ ع قد ما مشاغلنا كتيرة وهمومنا الأرضيِّة آخدِة كلّ وقتنا، منصير نلغي صلا من هون وقدّاس من هون، وعمل رحمة من هون... وهيك منقَصقِص جوانحنا يَلّي بتوصِّلنا لعند الله.
خلّينا من مرَّة لمرَّة نتذكَّر هالخبريِّة ونعرِف عن شو بدنا نتخلّى بحياتنا، ت تصير حياتنا أجمل مع الله». والله معك.
المصدر : صوت المحبّة
