الله معك...
بيخبرو عن رِجّال ختيار بالإمبراطوريِّة الرومانيِّة كان عندو ولدَين، الأوَّل فات ع الجيش، والتاني كان شاعِر معروف بمدينة روما.
بليلة من الليالي بيظهر ملاك على هالرجّال الختيار وبيقِلّو :
«إبنَك رح بيخلّدو التاريخ وكلماتو رح بتضل تتردَّد للأبد».
وِعي الختيار من الحِلم فرحان كتير، وخلال النهار صار معو حادِث ومات... وُصِل ع السما، بيلتقي بالملاك يَلّي شافو بالحلم بيقلّو :
«بشكرك ع يَلّي خبَّرتني ياه بالحِلم بس بترجّاك رجِّعني بالزمن لشوف أيّا قصيدة من قصايد إبني رح بردِّدوها الناس للأبد؟»
بيجاوبو الملاك :
«الكلام مش لإبنَك الشاعر الكلام لإبنَك الجندي يلّي بيصير قائد مئة، وبيوم من الإيّام بيمرض خادم من خدّامو، وكل الأطِبّا ما بيقدرو يشفوه... بيلتقي بيسوع المسيح، بيآمن فيه، وبيطلب مِنّو يشفيلو خادمو وبيقلّو :
«يا ربّ لستُ مُستحقًّا أن تدخُلَ بيتي لكن قُلْ كلمة واحدة فيحيا فتاي، وهيك بإيمانو الكبير، كلامو بيخلِّد وبيضَلّ للأبد».
الزوّادة بتذكّرني وبتذكرك بكلام الإنجيل المقدَّس :
«إذا عندك إيمان قد حبِّة الخردل بتقول للجبل قوم ونزال، فكيف إذا عندك إيمان متل قائد المئة؟... أكيد ذِكرَك رح بيدوم، وبيدوم للأبد».
المصدر : صوت المحبّة
