الله معك...
بيخبرو عن شبّ قرَّر يحضر بيوم من الإيّام درس لشرح الكتاب المقدّس.
راح ع الصفّ، وشو كانت صدمتو كبيرة لمّا شاف الإستاذ فايِت ومعو صندوق ليمون.
طلب الإستاذ من كلّ تلميذ ياخُد ليمونة ويتأمَّل فيها لمدِّة خمس دقايق.
وبعد خمس دقايق طلب منُّن يردّو الليمونات ع الصندوق.
بس القصَّة ما خلصِت هون، رجع طلب منُّن يقربو ع الصندوق وكل واحد يتعرَّف ع ليمونتو.
لـمّا خلص الإختبار قلُّن الإستاذ :
«الله بيستحق أكتر من خمس دقائق حتَّى نتأمَّل حضورو بحياتنا... بيستحق نحكي معو ونتعرَّف عليه أكتر وأكتر».
الزوّادة بتقلّي وبتقلَّك :
«ما بيكفّي نخلق بعيلة مسيحية، نتعمَّد ونحمل إسم المسيح حتَّى نتعرَّف عليه، لازم نسجد قدّام بيت القربان ونتعرَّف ع يسوع بقلوبنا حتّى نكتشف محبتو». والله معك.
المصدر : صوت المحبّة
