الله معك...
بيخَبرو عن صَبي زغير إجا لعند بَيّو وسألو :
«بابا انتَ قدَّيش بتُقبَض بالشهر؟»
البَيّ ما بيرِدّ، الصبي بيِسأل بَيّو من جديد :
«طيِّب قدَّيش بتُقبَض بالنهار؟»
كمان البَيّ ما بيجاوب، بيِسألو :
«بابا بعرف إنّي عَم إزِعجَك بس قدَّيش بتُقبَض بالساعة؟»
عصَّب البَيّ وقَلّو :
«١٠٠ دولار»... !!
بكِلّ براءة الصبي بيقِلّو لبَيّو :
«مُمكِن تعطيني خمسين دولار؟»
البَيّ بيِسأل بعصَبيِّة وبيقول :
«أكيد بدَّك تشتِري شي لعبة بلا طعمة، بسّ أحلى ما تضَلّ تنِقّ تفضَّل هَيدي خمسين دولار»
الصَبي بيِحمِلا وبيفوت على غرفتو، بيِلحقو البَيّ لحَتَّى يشوف شو بَدّو يعمِل، بيلاقيه عم بيعدّ مصاري، بيقِلّو :
«لشو هالمُصريّات؟ مُمكِن أعرِف؟»
بيقول الصَبي :
«بابا صار معي ١٠٠ دولار، مُمكِن تبيعني ساعة من وقتك؟»
الزوّادة بتقلّي وبتقلَّك :
«نحنا يَلّي غرقانين بهموم الشِغِل، لازِم نتطَلَّع شمال ويَمين، في حدّنا بَيّ أو إمّ، خَيّ أو إخت بحاجة لدقيقة من وقتنا، خلّينا نعطيُن ياها، بالنسبة لإلُن هيّي أتمن مِن كِلّ مال الدِني». والله معك.
المصدر : صوت المحبّة
