منرفع يا ربّ أجمل ألحان التمجيد والتسبيح لإسمك القدّوس ، ومنشكرك عا هالصباح اللي عم تشرقو علينا من نورك.


يا ربّي يسوع، إنتَ اللي عطاك الله الآب كلّ السلطان اللي بالسما واللي عالأرض، وحقَّقت مشيئتو عا أرضنا لمَّن زرعت المحبِّة والسلام بقلوب رُسُلك وتلاميذك وكلّ اللي كانو عم يسمعوك.

يا ربّي يسوع، كتير حاول الشيطان إنّو بخربط مشروعك الخلاصي عالأرض لمَّن زرع الشكّ بأفكار التلاميذ والرُسُل، بس ما قدر لأنَّك، بقيامتك من بين الأموات وظهورَك عالتلاميذ وإرسالك لإلُن تا يبشّرو فيك، كبَّلت كلّ مُحاولاتو وغلبتو وإنتصَرت.

إنتَ يا يسوع حياتنا وراحتنا وسلامنا، لأننا فيك منغتني، ومعك منغلب الموت، وصوبَك عم يتوجّه كلّ مشروع حياتنا، وعندك منلاقي الحياة والفرح والطمأنينة اللي ما إلُن حدود.

/الخوري يوسف بركات/