السما والأرض، اللي كوَّنتُن يا ربّ، وكلّ اللي فيها بيسَبّحوك وبيعَظّموك بصباح هالنهار اللي فيه بعدك عم تشرق علينا نورك، رغم كلّ ضعفنا.
يا يسوعنا الغالي، القبر اللي قبروك فيه صار فارغ ورمز لعلامة إنتصارَك عالموت اللي كان هالك البشريِّة، وصار معك الموت عبور وإنتقال من هالحياة الفانية للحياة الأبديِّة.
يا يسوع، الحُبّ المُنتصِر عالموت، صار معك القبر مركز للملايكة والنور بعد ما كان مقرّ الظلام والموت، وخلَّيتو يصير الطريق للحياة مرصوصة بالأعمال والأقوال الصالحة.
وتا نوصَل لعندك يا ربّ، ما فينا إلّا من خلال القبر اللي صار طريقنا الوحيد لعندك، واللي من خلالو عم بتنادي المجدليِّة والنسوة اللي معا، وبتنادينا، تا نلتفِت لإلَك بإيمان ونستقرّ فيك، ونعلُن قيامتك بحياتنا ونعكِسا فِعل حُبّ وسلام مع كلّ اللي عم نلتقي فيون.
