بهالأحد المبارك منرفعلك ياربّ السما والأرض أجمل التسابيح والشكران عا محبّتك ورحمتك الكبيرة.


قدَّيشا محبتك ورحمتك كبيرة يا ربّ تا تغفرلنا بعد كلّ هالخطايا اللي منعملا تجاهك؟ 

دايماً بتقلنا إننا ولادك وإنَّك بتحبّنا كيف ما كِنّا ولو حتَّى كِنّا بعاد عنَّك.


شو صعب علينا يا ربّ إنّنا نحِسّ بالغلط اللي منعملو وما نعترف فيه، والأصعب إننا نطلب المغفرة من اللي غلَّطنا بحقُّن إن كان بالحكي أو بالفعل.


يا بيّنا اللي كلَّك رحمة، كلّنا رجا إنَّك تغفرلنا كلّ مرّة مننسى إننا نطبِّق وصيتك، وصيِّة المحبِّة، أغفرلنا بكِلّ مرَّة ما منقبل اللي بيلجألنا لمساعدة او لحضورنا حدّو.


كلنا رجا يا ربّ إنَّك تغغرلنا ضعفنا وجبننا وخاصَّةً لمَّن ما منهتَمّ بإخوتنا، ولمَّن منحسِّسن إننا أهمّ أو أحسن مِنُن.


رجانا يا ربّ إنَّك تزيدنا إيمان ومحبِّة وتوبة حقيقيِّة تا نرجع نتجدَّد فيك ونعيش معك وإلك كلّ حياتنا الباقية.

/الخوري يوسف بركات/