مع كلّ نسمة هوا وكلّ طلعة صباح منرفعلك يا ربّ أصوات التسبيح والمجد من عمق أعماقنا.


بهالصوم المبارك، عم نوعى أكتر وأكتر إنَّك وحدك مصدر الحياة يا ربّ، وعيوننا عم تتفتَّح على معنى وجودنا كأبناء وبنات للآب بهالصوم المبارك، عم نتعلَّم أكتر وأكتر إنّو التعلُّق بالإشيا وبالممتلكات الزمنيِّة ما رح يعطينا الحياة، ولا رح يأمِّنلنا السعادة والسلام.


بهالصوم المبارك، منتأكَّد إنّو لمَّن بيوصل الموت رح ياخد كلّ الناس، بس الفرق إنّو الفقراء اللي متِّكلين عليك يا ربّ رح تنصُفُن بملكوتك، والأغنيا اللي متِّكلين عا ذاتن وأصحاب السلطة ما رح ياخدو لا ممتلكاتن ولا سلطُتُن معن.


لهيك منتعلَّم مِنَّك ومن كلامك يا ربّي يسوع إنّو ما نعيش لهالعالم الفاني والزايل، لا بل للحياة معك.

/الخوري يوسف بركات/