ةمنرفعلك التسبيح والمجد والإكرام يا إله السما والأرض ومنشكرك عا هالصباح الحلو اللي بتشرقو علينا.

يا ربّي يسوع، بيكفي إنّو تغمِّض عَينَك تا حتَّى تثور علينا أمواج هالعالم وتحاول تغرِّقنا ببحر الخطيِّة اللي بتحاول تحجُب عنّا نورك، بس مش رح تقدر تقوى علينا لأننا متحصّنين بقوِّة روحك القدّوس.

يا ربّ، قوِّتنا فيك، وخلاصنا من عندك، إنتَ اللي بتُأمُر البحر والريح والجبال، وبكلمة مِنَّك بتطيعك وبتخضعلك متل الحمل الوديع بين إيدين خالقو.

وقدّام مغريات العالم، بتبقى وحدك الساهر وعم ترعى الكنيسة دايماً، وتحميها من الشرّير اللي ناطر غيابك تا يهدم كنيستك ويفرِّق جماعتك، بس إيماننا فيك يا ربّ هوّي السلاح الكبير، لأنَّك إنتَ الإله اللي ما بينعس ولا بينام.

ومِنَّك منتعلَّم كيف نسلّمك ذاتنا كلّ ما اشتدِّت علينا الصعوبات، ومعك منشهد على قيامتك بحياتنا.

/الخوري يوسف بركات/