يا ربّي يسوع، العالم عم يبني هيكَلو الظالِم التافِه وعم يحاول يسكِّر باب حُبَّك لإلنا، بس ما رح يقدر لأنّو حُبَّك بيطهِّر صدي الخطيِّة اللي فينا.

يا ربّي يسوع، بقيامتك من بين الأموات صار علينا إننا نهدُم هالعالم القديم والمادّي ونأسِّس عالم جديد مطرح ما في لا حُزن ولا ألم ، لا بل في غِنى روحي.


بس بيبقى يا ربّي بهالعالم تُجّار الهيكل، اللي عم بيشوّهو صورتك، تُجّار الإنسان اللي ما عندُن رحمة ولا شفقة بقلوبن.


منشوفك يا ربّ اليوم وكلّ يوم جايي تا تبني مملكة الله بهالعالم وعم تطرد إبليس مِنّو، وبقلبك هدف إنّو كلّ واحد وواحدة مننا يعيش بحسب رغبة قلبك.


يا ربّي يسوع، ما بدنا نكون من تُجّار هيكلَك، بدنا نفهم إنّو خطيِّة الخطايا هيّي إننا نحطّ المال إله حدَّك.

مِدّ إيدَك يا ربّ وشيلنا مِنّو.

/الخوري يوسف بركات/