الله معك...
بتخبِّر سِتّ وبتقول، بيوم من الإيّام كِنت ماشيِة بالطريق، بشوف آرمة مكتوب عليها (سوبرماركت السما).
بقرِّب صَوب الباب، بينفَتَح قدّامي، بيستَقبِلني ملاك، بيقَدِّملي سلِّة وبيقِلّي :
«تفضَّلي يا أهلا وسهلا، فيكي تاخدي كِلّ يَلّي إنتي بحاجة إلو».
كان المحل مِتلان من كِلّ الأصناف، أوَّل رَفّ هوّي للصبر، أخدت حاجتي مِنّو.
تاني رَفّ للمحبِّة، عبَّيت منها وكمَّلت طريقي، بوصَل ع رَفّ الحكمِة، وهَون الملاك بيتدَخَّل وبيقِلّي :
«خِدي كتير من الحكمِة بتِلزَمِك، بتعوزيها وين ما بتروحي».
وقدّام رَفّ الإيمان أخَدِت أكتر ما فيّي، وأكيد ما حَرَمت حالي من شويِّة شجاعة، وتذَكَّرت إنّي بحاجة كتير لنعمة المغفرة، أخدِت إلي ولغَيري... وقِفِت بالصَفّ لإدفع، ولـمّا وصُلت ع الصندوق، لقيت كياس من الفرح والسلام والصلا، حمِلت قد ما فيّي، سألت الموظَّف :
«قدَّيش بتريد؟»
إبتَسَم وقَلّي :
«الحساب مسدَّد»
ولَـمّا أصَرَّيت إنّو لازم إدفَع، إبتَسَم وقَلّي :
«يسوع مسدَّد عَنِّك الحساب من زمن طويل!»
الزوّادة بتقلّي وبتقلَّك :
«الربّ يسوع إجا ع الأرض، وكرمال خلاصنا، إفتدانا ودَفَع عَنّا التَمَن الغالي يَلّي هوّي دَمّو ع الصليب». والله معك.
المصدر : صوت المحبّة
