الله معك...
بيخَبرو لـمّا كانو عم يرفَعوا المسلّات بمصر، عن مسلِّة كتير تقيلة لدرجة إنّو الحبال كانِت رح تتقطَّع هِنّي وعم يرفعوها، رجّال ختيار بيُصرُخ برفقاتو وبيقلُّن :
«بِلّو الحبال بالمَي، هيك بتصير الحبال طريِّة وقويِّة وبتتحمَّل تقل أكتر».
قولكُن، قدَّيش فينا نشبَّه هالحبال القاسية، لقلب الإنسان المتصلِّب يَلّي ما بيُصمُد قدّام تجربة الشرّ وبيستَسلِم دِغري للخطيِّة، بينما القلب المبلَّل بالنعمة وحدو بيقدر يواجِه كِلّ التجارب الصُعبِة ؟
الزوّادة بتقلّي وبتقلَّك :
«إنتَ الكائن الوحيد يَلّي بيبكي... لـمّا بتتوجَّع بتبكي، ولـمّا بتفرح بتبكي، كون أكيد إنّو الدمعة، هيّي دمعة القلب، مش دمعة العين». والله معك.
المصدر : صوت المحبّة
