الله معك...
بيخَبرو عن الكاتِب الإيرلندي جورج برنارد شو كان يقول :
«أذكى إنسان عرفتو بحياتي هوّي خيّاطي، لأنّو كلّ مرَّة كِنت روح لعَندو، بياخِدلي قياسي من جديد، بوَقت يلّي بقيِّة الخيّاطين بياخدو القياس مرَّة وحدة، وبيصَنّفو الزبون ع طول وبيحَطّوه بإطار معيَّن وبيَعطوه قياس بالطول وبالعرض»...
ونحنا هيك منعمل، منصَنِّف الناس وممنوع نعطيهُن فرصة حتَّى يتغٌيَّرو، مع إنّو أحكامنا، ومرّات كتيرة، بتكون مبنِيِّة عَ أفكار مُسبَقَة، وإذا هالإنسان جرَّب يغيِّر سلوكو وتصرُّفاتو، منقول أكيد عندو غاية ومصلحة من ورا هالشي!
الزوّادة بتقلّي وبتقلَّك :
«كِلّ مرَّة بتلتقي بخيَّك الإنسان شوفو بعيون جديدة، واعطي مجال حتَّى يكون إنسان جديد ولو غُلِط مرَّة وتنَين وتلاتة...
نَظرِتنا للناس بتخلّيهن يتغيَّرو عَ مِثال نظرات يسوع يَلّي غيَّرِت النازفة وخاطيين كتار». والله معك.
المصدر : صوت المحبّة
