الله معك...
بيخبرو عن سكّير مُدمِن، كان يبيع عفش بَيتو ليشتري الويسكي.
وبعد ما تعرَّف ع يسوع الإله والمُخلِّص تغيَّرِت كِلّ حياتو.
بيقِلّو تاجر الويسكي هوّي وعم يتمسخر عليه :
«إذا بتآمن بيسوع المسيح، يعني بتآمِن بهاك القصَّة يلّي بتقول إنّو هوّي يَلّي حوَّل المَي لخمر بعرس قانا الجليل؟»
جاوب السكّير :
«بكلّ بساطة أنا ما بعرف ولا أيّ شي عن قصِّة تحويل المَي لخمر، بس بعرف إنّو يسوع حوَّل الخمر لأثاث بقلب بيتي، وبدل ما أُصرُف مصريّاتي ع الويسكي، صرت عم إشتري عفش لبيتي، بعد ما آمنت فيه».
الزوّادة بتقلّي وبتقلَّك :
«الربّ هوّي نبع الحياة، هوّي نقطة التحوُّل بحياتنا، هوّي يَلّي بيهدينا ع الطريق الصحيح متل تلميذَي عمّاوس والقدّيس بولس، المُهِمّ نخلّي قلبنا يسمع همسات اللّه». والله معك.
المصدر : صوت المحبّة
