الله معك...
بيخبّرو عن مالك كبير بكاليفورنيا، كان عم بيفتِّش عن حدا يستثمر أرضو، بس المشكلة إنّو العواصف كانِت تحطِّم البيوت البلاستيكيِّة وتِتلُف المحاصيل.
بيوم من الإيّام بيِجي لَعندو شخص غريب وبيُطلُب مِنّو يستثمر الأرض، ولـمّا سألو شو مشروعو لَهالأرض خاصَّةً لـمّا بتهِبّ العواصف جاوبو :
«أنا بنام لمّا بتهِبّ العواصف».
تعجَّب صاحب الأرض من جوابو، وإتَّفَق مع الرِجّال الغريب ع عقد الإستثمار.
بعد فترة طُلعِت عاصفة قويِّة ركض صاحب الأرض ت يشوف شو صاير بالمشروع، وبالفعل كان الرِجّال نايم، هزّو بقوِّة وقَلّو :
«قوم في عاصفة!»
جاوبو :
«ليش عم بتوعّيني، ما أنا قلتلَّك، وقت بتطلع العاصفة بنام، لأنّي بكون مستعِدّ ومحَضِّر كلّ شي من قَبِل ما تِطلَع».
الزوّادة بتذكّرني وبتذكرك :
«بكلام الربّ يسوع، إسهرو وصلّو لأنكن ما بتعرفو أيمتى بيمرق السارق».
المصدر : صوت المحبّة
