الله معك...
بيخبرو عن رِجّال كتير مؤمِن، كان قاعِد بمنتزه، لـمّا قرَّب مِنّو طبيب مشهور وقعد حدّو وبلَّشو يحكو عن الإيمان المسيحي.
بيقول الطبيب للمؤمِن :
«معقول إنتَ بتآمن بالإنجيل؟»
بيجاوِب المؤمِن :
«شو بتقول عن إنسان كان عندو مرض خطير ما قدر ولا طبيب يشفيه، لحتّى بيوم من الإيّام إلتقى بطبيب وصَفلو دوا وشِفي من مرضو، وبعد فترة شاف إنسان عندو نفس المرض، عطاه الوصفة، بس هيدا الأخير ما أخدها، شو بيكون هالإنسان برأيك؟»
جاوَبو الطبيب :
«بيكون إنسان غبي».
ساعتِها جاوَب المؤمن :
«أنا من حوالي ٢٥ سنة تعرَّفِت ع يسوع وع إنجيلو يَلّي شفاني من أمراض مستعصية وخطيرة، ومِن وقتها، وأنا بعطي هالوصفة لكلّ يَلّي بلتقي فيهُن وهنّي بحاجة إلها، وهلَّق شو بتقول عن نفسَك إذا ما بتجرِّب هالوصفة؟»
الزوّادة بتقلّي وبتقلَّك :
«يسوع كنز كبير ما فينا نخبّيه، بالعكس نحنا لازم نعكسو لكلّ الأشخاص يَلّي منلتقي فيهُن، وهنّي عليهُن يختارو، يا بيِمشو بالنور أو بيضَلّو بالعتمة». والله معك.
المصدر : صوت المحبّة
