الله معك...
بيخبرو عن رجّال كان عايش مع مَرتو حياة هنيِّة.
بيوم من الإيّام إكتشف إنّو مَرتو خَفّ سمعها، قرَّر يستَشير طبيب العيلِة قبل ما يعرضها ع طبيب أخصّائي، قلّو طبيب العَيلة :
«إحكيها بشكل عادي وإذا ما سِمعِت قَرِّب مِنها شوي، وإذا ما سِمعِت قَرِّب أكتر حتَّى لو إضطرَّيت توصَل لحدها، وإذا ما سِمعِت ساعِتها لازِم نعرضها ع أخصّائي».
رِجِع الرجّال ع البيت وسأل مرتو :
«حبيبتي شو عاملي غدا اليوم؟»
ما جاوَبِت، قرَّب أكتر وسألها مرَّة تانية، كمان ما جاوبت، وهيك ضلّ يعيد حتَّى صار وراها وسألها :
«حبيبتي شو الغدا اليوم؟»
ساعتها بيتفاجأ لـمّا بيسمعها عم بتقِلّو :
«يا عَمّي صُرت مجاوبِتَك أربع مرّات، الغدا دجاج وبطاطا».
الزوّادة بتقلّي وبتقلَّك :
«مرّات كتيرة، منفَكِّر إنّو المشكلة بغيرنا، بس مع الأسف بتكون المِشكلِة مِنّا وفينا». والله معك.
المصدر : صوت المحبّة
