الله معك...
بيخبرو عن رِجّال ومرتو، راحو سوا ع جنينة للحيوانات.
أوَّل مشهد شافوه، قرد عم بيعبِّر عن حُبّو لرفيقتو القردة، هالشي خلّا المرا تقول :
«شو حلوة قصِّة هالحُبّ!»
من بعد هالمشهد يلّي استوقفُن لَلحظات، تابعو جولتُن ووصلو لعند ملك الغابة، وشافوه زعلان واللبوة بعيدة عَنّو شوي.
قالت المرا لزوجها :
«قصِّة هالأسد مع مرتو قصِّة حُبّ مأساويِّة!»
بيرِدّ زوجها عليها وبيقلّها :
«كِبّي هالقنّينة الفاضية صوب اللبوة وشوفي شو رح بيصير، وبعدين إحكمي!»
وبالفعل هيك صار، والمفاجأة كانت إنّو الأسد هاج ت يدافع عن اللبوة!
قدّام هالمشهد قرَّرِت المرا تزِتّ قنّينة ع قفص القرود المفاجأة إنّو القرد هرب وترك القردة لحالها.
الزوّادة بتقلّي وبتقلَّك :
«ما ننخدع بالمظاهر الخارجيِّة، في ناس بيخدعو غَيرُن بمشاعِرُن المُزيَّفِة، في ناس بيحتفظو بالحُبّ وبمشاعِرُن الحقيقيِّة داخل قلوبُن، وما بيعَبّرو عنها إلّا بأعمالُن».
المصدر : صوت المحبّة
