الله معك...

بيخبرو عن شاب مسيحي كان يعيش حياة بسيطة مليانة محبِّة وخدمة للغير.

ما كان يوعَظ بكلمات، ولا يكتُب تأمُّلات، ولا يِحمُل لافتات، لكن حياتو اليوميِّة كانِت شهادة حقيقيِّة للمسيح.

بالمحل يلي بيشتغل فيه، الكِلّ كانوا يشهدوا لأمانتو، إحترامو، ومحبتو للجميع.

ما كان يغتاب، ما كان يسرُق وقت الشغل، وكان دايمًا أوَّل شخص يساعد غيرو.

يوم من الإيّام، سألِتو زميلتو يلّي ما بتآمِن بالله :

"شو السرّ؟ ليش دايمًا فيك سلام وفرح؟"

إبتسم وقال :

"أنا عم حاول بس عيش متل ما علَّمني يسوع."

من دون ما يوعَظ، من دون ما يحكي كتير، صار سبب لتغيير قلوب من حَولو. 

هيدا هوّي المسيحي الحقيقي : 

إنجيل حَيّ ماشي عالأرض.

تأمُّل اليوم :

مش مطلوب مِن كِلّ مؤمِن يكون واعِظ، لكن كِلّ مؤمن مدعو يكون شاهد.

شهادتَك مش بالكلام، بل بالسلوك.

حياتك اليوميِّة هيّي أقوى رسالة بتوصلها للعالم.

من الإنجيل :

"هكذا فليُضئ نوركم قدّام الناس لكي يروا أعمالكم الصالحة ويمجّدوا أباكم الذي في السماوات."

(متى ٥: ١٦)

صلاة صغيرة :

يا ربّ، ساعِدني كون شهادة حيِّة لإلَك بكلّ يوم، بكلّ تصرُّف، وبكلّ موقف.

خَلّي الناس يشوفوك فيّي، ويشتاقوا يتعرَّفوا عليك. آمــــــــــــين.

فريق عمل خدّام الربّ ®