الله معك...
بيخَبرو عن طفل زغير عطاه بَيّو قنّينة قزاز بقلبها في ليمونة كبيرة، تعجَّب الصبي كيف فاتِت هالليمونة بقلب القنّينة، جرَّب يطلِّعها بس ما كان يقدر، سأل بَيّو :
«كيف فاتِت هالليمونة يَلّي حجمها كبير، بقلب القنّينة يَلّي راسها زغير؟»
أخدو بَيّو على الجنينة، جاب قنّينة فاضية، وحط فيها بذرة ليمون كتير زغيرة وعلّق القنّينة بالشجرة، وهيك صارت الليمونة تكبر وما عاد ممكن تطلع من القنّينة.
الزوّادة بتقلّي وبتقلَّك :
«هيك الطفل إذا منزرع بداخلو وبراسو الأفكار الحلوة بتكبر فيه وبيكبر فيها وبيصير صعب عليه يتخلّى عنها». والله معك.
المصدر : صوت المحبّة
