الله معك...


بيخبرو عن بَيّ عندو مركب، وكان إبنو يطلع معو بالبحر.

بيوم من الإيّام طلب الإبن ياخُد صديقو معو.

كان الجوّ صافي، بس بعد وقت قليل، بلَّش الغيم الأسود يغطّي السما، وطُلعِت عاصفة قويِّة وقَلَبِت المركب.

خاف البيّ ع حالو وع إبنو وع رفيقو.

وبعد تعب، قِدِر يمسُك بطرف حبل كان مربوط بالمركب، وهون وقع هالبيّ بصراع كبير، مين بيخلِّص، إبنو أو صديقو، وبيسألهن :

«اذا غرقتو بتعرفو لوين رايحين؟»

جاوب إبنو :

«أكيد أنا رايح لعند يسوع». 

ساعتها قرَّر البَيّ يخلِّص صديق إبنو، سحبو بالحبل وطلَّعو على المركب، ولـمّا رجع عند إبنو إكتشف إنّو غِرِق، وابتلعو الموج. 




الزوّادة بتقلّي وبتقلَّك :


«الآب السماوي ضحّى بإبنو لخلاص كلّ واحد مِنّا، ورسملنا درب نمشي عليها، لنعرف إنّو بعد هالحياة، نحنا كلنا راجعين لإيدَين الربّ يلّي طلعنا منها».

المصدر : صوت المحبّة