الله معك...
بيخَبرو عن فلاّح كان عندو حقلة زرعها بطّيخ، قبل موسم القطاف، بيحِطّ كرتونة ع بوّابة الحقلة، وبيكتُب عليها :
«في بَطّيخة مسمومة».
بيسألو حفيدو :
«معقول يا جدّي حاطِط سمّ بالبطّيخ؟»
بيقِلّو الجِدّ :
«أكيد لأ بس هيك بضمن إنّو الحراميّي ما رح يسرقو البطّيخات».
بيقِلّو الصبي :
«يا جدّي إنتَ عم تكذب وهيك رح تخسر بركة ربنا».
تاني يوم بيروح الفلاّح ع الحقلة، بيلاقي الحراميّي كاتبين ع الكرتونة :
«في بطّيختَين مسمَّمين».
بيضيع الفلاّح إذا هالشي صح أو غلط، وهيك خسر الموسم وخسر ثقة رَبّو متل ما قَلّو حفيدو.
الزوّادة بتقلّي وبتقلَّك :
«حبل الكذب قصير، والكذبة بتجِرّ كذبة... فَكِّر قبل ما تكذُب قول الحقيقة متل ما هيّي». والله معك.
المصدر : صوت المحبّة
