الله معك...
بيخَبرو عن راهِب شَبّ سأل ناسِك كان عم يتّلمِذ ع إيدو وقَلّو :
«يا معلمي كم مرَّة بمرَّة صُرت معتِرِف عندك بخطاياي وسامِع كلّ إرشاداتك وتعاليمك بس مع الأسف مش عم إتغيَّر، وعم حِسّ بملل وضجر لأنّي عم برجع أوقَع بذات الخطايا من جديد».
جاوب الناسِك :
«لازم تجيب قَدَرَين من الفخّار، الأوَّل مليان بالعسل والتاني فاضي، وسكوب العسل من وِعي للتاني، أكتر من مرَّة.»
نفَّذ التلميذ طلب معلمو، ومن بعد ما رجع لعندو، قال الناسك للتلميذ :
«تأمَّل بالوعي يلّي كان فاضي وشِمّ ريحتو».
جاوب التلميذ :
«ريحتو عسل وكمان بكعبو في شويِّة عسل».
جاوَب الناسِك :
«كلامي وإرشادي هيك بيعملو فيك، بيساعدوك حتَّى تتعلَّم جزء كتير زغير من الفضيلة والربّ الرحوم هوّي يلّي بيملّي فراغ نفسك وبيخلصك، شرط تستسلم لإلو وتحطّ حالَك بين إيديه».
الزوّادة بتقلّي وبتقلَّك :
«الربّ كِلّو رحمة وجودة، بيكفّي نتذكَّر كلام الكتاب المقدّس ونلقي ع الربّ كلّ همومنا، وهوّي بيريِّحنا».
المصدر : صوت المحبّة
