الله معك...
بيخبرو عن عازِف الكمان الإيطالي الشهير نيكولا باغانيني قصَّة مشهورة بتقول :
«مرَّة كان نيكولا عم يعزُف بحفلة كتير كبيرة، إنقطش معو أوَّل وَتَر مِن أوتار الكمان، نيكولا كمَّل العزف وكأنّو ما صار معو شي، بسّ المشكلة اللي ما كان يتصوَّرها حدا، هيّي إنّو الوَتَر التاني إنقطش معو، وكمان الوَتَر التالت، بسّ المُفاجأة إنّو نيكولا كمَّل العزف ع وَتَر واحد ولـمّا خُلصِت المعزوفة، زقَّفولو الناس كتير وطلب مِنّو قائد الأوركسترا يعزُف القطعة الموسيقيِّة مرَّة تانية، ويَلّي صار إنّو نيكولا رجع عزفها كلّها، ع وتر واحد.
الزوّادة بتقلّي وبتقلَّك :
«لو مهما تقطَّشِت أوتار بحياتنا... لو مهما مرقنا بعلاقات فاشلة وما حقَّقنا يَلّي منحلم فيه أو يلّي منريدو بحياتنا، بيضَلّ يسوع الوَتَر يَلّي لازِم نكَمِّل عليه عزف أنشودة حياتنا».
المصدر : صوت المحبّة
