الله معك...
بيخبرو عن سِت مريضة، خبَّروها الأطِبّا إنّو ما رح بتعيش أكتر من شهر.
طلبِت هالسِت كاهن الرعيِّة، ومن بعد ما صلّو سوا، قالتلو :
«بحب الدفن يكون هيك، والتراتيل هيك والصندوق هيك، بس بترجّاك تحمِّلني بإيدي شوكة».
تعجَّب الكاهن من طلبها وسألها عن السبب، جاوبتو والبسمة ع شفافها :
«كلّ مرَّة كنت روح ع غدا أو ع عشا، كانو يقولولنا هنّي وعم بيشيلو الصحون، نخلّي الشوكة معنا، لأنّو في طبق أطيب رح ينزل ع الطاولة وأنا أكيدي إنّو بعد هالحياة، ناطِرني طبق أطيب».
الزوّادة بتقلّي وبتقلَّك :
«نحنا ع هالأرض برحلة، وطنّا الحقيقي هوّي السما، وهونيك أكيد رح مندوق الطبق الأطيب».
المصدر : صوت المحبّة
