الله معك...
زوّادِة اليوم بدها تحكيك.
يِمكِن بَدها تِسألَك شي.
إفتَح قلبَك وإسمَعها وإترِكها تقِلَّك اللي بدها ايّاه.
بنت زغيرِة مِن حَيّ فقير، دَخَلِت المستشفى بنهار عيد الميلاد.
وبذات الليلة، إجا شخص يخَبِّرها قُصِّة ميلاد يسوع وكيف وُلِد وصار بيناتنا.
وفِرحِت كتير الزغيرة بهالخبرِيِّة : نِسْيِت وَجَعها ونَوَّر وِجّا، وضُحكِت مِن قَلبها.
والتَفَتِت صَوب المُمَرِّضَة الواقفِة وسألِتها :
- قدَّيش حِلو هالخبر؟ إنتِ كنتِ عارفي إنّو يسوع إجا ع الأرض؟
-
وجاوَبِتها المُمَرِّضَة :
«أكيد عارفي».
تطَلَّعِت فيها البِنت بِتَعَجُّبّ وقالِتلها :
«كِنتِ عارفي؟ ما كان مبَيَّن علَيكِ أبداً !»
وقالِتلها المُمَرِّضَة :
«لَيش شو مبَيَّن علَيِّ؟»
وجاوَبِتها الطُفلِة :
«مبَيَّن علَيكِ إنّو بعد ما حَدا خَبَّرِك إنّو يسوع إجا».
إخوتي، ونحنا اللي خَبَّرونا إنّو يسوع إجا خَلَّصنا، قَولكُن ليه مِش مبَيَّن علَينا ؟ والله معك.
المصدر : صوت المحبّة
