الله معك...
بيخبرو عن شمعة كانِت عم بتدوب ع ورقة، صرخِت وقالت :
«شو هالوجع، يا ريت حدا بيخلِّصني وبيقلبني راس ع كعب، هيك بدوب أسرع».
بتصرُخ الورقة وبتقول :
«ليش هالعذاب كِلّو أنا شو عملت حتَّى تحرقوني؟»
سمع الختم الحديث بين الورقة والشمعة، بسرعة قام من محلّو وطبع صورتو علَيُن، صرخِت الورقة والشمعة مع بعضن :
«ليش كلّ هالقساوة؟»
إبتسم الختم وقلُّن :
«أصبرو».
بعد شوي، تجمَّد الشمع وبيَّنِت صورة الختم ع الورقة، وهون بيقِلُّن الختم :
«شفتو هيك صرتو حاملين ختم الملك وصار إلكُن قيمة أكتر من الأوَّل، لولا الألم والوجع كنتو بعدكُن مُجرَّد شمعة وورقة فاضية».
الزوّادة بتقلّي وبتقلَّك :
«الورقة هيّي حياتنا، والشمعة هيّي أنا وإنتَ، والنار هيّي المحبِّة يلّي بتدوِّبنا... وبِقَدَر ما بتدوِّبنا، بتنطبع فينا صورة الله، حتَّى بالألم نكون عم نشهد لإلو».
المصدر : صوت المحبّة
