الله معك...

إسمَع هالخبريِّة :

كان مرَّة الفَيلَسوف ديوجين عم ياكُل ع العشا شوربِة عَدَس، شافو الفَيلَسوف أريستيب اللي كان عايِش بحاشيِة المَلِك حياة تَرَف ورفاهيِة.

قَلّو لديوجين :

- لو تعَلَّمت تِسجُد قدّام المَلِك، ما كِنت اليوم عم تاكُل عَدَس !

وجاوَبو ديوجين :

- لو تعَلَّمت تِكتِفي بالعَدَس، ما كِنت اليوم عَم تِزحَف قدّام المَلِك.

وفِهمَك كفايِة.

الزوّادة اليوم عم تسألَك :

إنتَ، لَمين عم تِسجُد؟ ولَيش؟

عَم تِطرَح علَيك السؤال حتَّى تقول إنّو القناعة تَحَرُّر وكرامِة، والسجود للحُرِّيِّة والكرامِة لغير الربّ عبوديِّة وذِلّ. والله معك.

المصدر : صوت المحبّة