الله معك...
بيخَبرو عن مُرسَل كان عم بيبَشِّر بالمسيح بمدينة من مُدُن أفريقيا، بس مع الأسف الناس ما عِرفو طريق يسوع المسيح، رغم إنّو حياة المُرسَل كانِت صلاة يوميِّة، سجود قدّام القربان المقدَّس، وإحتفال بالذبيحة الإلهيِّة وخدمة للمُحتاجين وتقديم كِلّ المُساعدِة لإلُن.
لحتَّى بيَوم من الإيّام لِقيوه ميِّت هوّي وساجِد قدّام القربان.
حصيلة هالإيّام الطوال يلّي قضّاهُن بالرِسالة، قِدِر إنّو يعَمِّد مَرا ختيارة، بالمدينة كان في رجّال من أهل المدينة، كاتِب كتير مشهور، ألَّف كتاب عن هالمُرسَل والنتيجة كانِت إنّو بعد سنة من نشر الكتاب تعمَّد أكتر من ٢٠٠٠ شخص من أهل المدينة.
الزوّادة بتقلّي وبتقلَّك :
هالمُرسَل تمَكَّن من إنّو يتصَيَّد شخص واحد بصنّارِة الوعظ خلال حياتو، بوقت يلّي قِدِر إنّو يتصَيَّد الألوف من الأشخاص بشَبَكِة طهارتو وفضيلتو. والله معك.
المصدر : صوت المحبّة
