الله معك...
بيخبرو عن لاعب سِيرك مُحترِف، بيوم من الإيّام، مَدّ حبل من بناية لبناية تانية، يعني من مَيل، لمَيل تاني من الشارع، من دون ما يحطّ تحتو شبك للحماية.
وصار يعمل حركات بهلوانيِّة ع الحبل لدرجة إنّو كل يلّي كانو عم يقطعو الطريق، وقفو حتَّى يتفرَّجو عليه ويزقفولوه.
بنصّ العرض بيسألهُن اللاعب، إذا حدا مِنُّن عندو الشجاعة يقعد ع كتافو هوّي وعم يمشي ع الحبل، بس مع الأسف كِلُّن سكتو وما حدا كان عندو الشجاعة يرفع إيدو.
بيزعل المهرِّج وبيقلُّن :
«بشكُركُن ع حضوركُن بس بتأسَّف لعدم مشاركِتكُن».
الزوّادة بتقلّي وبتقلَّك :
«بمشروع الله الخلاصي الربّ مَنّو بحاجة لناس يتفرَّجو، الربّ بحاجة لمين يشاركو بمشروعو بكلّ شجاعة».
المصدر : صوت المحبّة
