الله معك...
بيخبرو عن بنت زغيرة، كانت عم تقطع الجسر مع بيها الختيار، خاف البَي الحنون ع بنتو توقع، فقلّها :
«يا بنتي مسِكي بإيدي منيح حتَّى ما توقعي بالنهر».
جاوَبِتو بِنتو من دون تردُّد :
«لا يا بابا، إنت مسِكلي إيدي».
ردّ البيّ هوّي ومستغرب :
«وشو الفرق بيني وبينِك؟!»
قدّام سؤالو، كان جواب البنت :
«لو أنا مسِكت بإيدك، يمكن ما إقدر إتحمَّل ومعقول كتير تفلت إيدي وأوقع، بسّ لو إنتَ مسِكت إيدي، أكيد ما رح تخلّيها تفلت منَّك أبدًا».
الزوّادة بتقلّي وبتقلَّك :
«بس توثق بيلّي بتحبُّن أكثر من ثقتك بنفسك، وتتطمَّن ع حياتَك بين إيديهن أكتر من إطمئنانك ع وضع حياتك بين إيديك، وقتها رح تعيش بسعادة وفرح...
لَهالسبب خلّي ثقتك بيسوع كبيرة، وسلّمو إيدك ليمسكها».
المصدر : صوت المحبّة
