الله معك...
بيخَبرو عن مَرا كتير فقيرة، لاقِت بَيضا، حِملِتا بكِلّ فَرَح وإجِت لعند زوجا وقالِتلو :
«يا رجّال اغتَنَينا»
قلّا :
«كيف؟»
قالِتلو :
«أنا لقيت هالبيضة رح آخِدها لجارنا بيحَطّها تحت الدجاجة عندو، البيضة بتصير صوص والصوص بيِكبَر بيصير دجاجة، والدجاجة بدورها بتبيض بَيض، ما مناكِلُن، منحَطُّن تحتا، وبيصيرو صيصان، والصيصان بيصيرو دجاج، والدجاجات بيِكترو كتير، منبيعُن ومنشتري بقرة، والبقرة بتخَلِّف بقرة زغيرة، وبعدان تنَيناتُن بيخَلّفو وهيك بيصير عنّا قَطيع بَقَر، منبيعُن ومنشتري قطعة أرض، منِستَثمِرا وبتعطينا مصاري، ومنشتري قطعة تانية ومنِستَثمِر التنَين، وأكيد رح منصير أغنِيا»
ومن كترة فرحِتا، كانِت عم بتشَبِّر، وِقعِت البيضَة من إيدا وانكَسَرِت، وتبدَّدِت كِلّ الأحلام.
الزوّادة بتقلّي وبتقلَّك :
«ما تصَدِّق كِلّ شي بينقال، ما تركُض ورا أحلام غير مُمكِنِة، حافِظ على يَلّي حاملو بين إيدَيك». والله معك.
المصدر : صوت المحبّة
