الله معك...
بيخَبرو عن رجّال، حَرَقِتلو النار كلّ شي بيِمِلكو، وأكتر من هَيك سَبَّبِتلو تشويه بِوِجّو، إجا أحد أصدقاؤو ليواسيه، وقَلّو :
«إنتَ هلَّق فَقَدت كِلّ شي».
جاوَب الرِجّال بفرح وقَلّو :
«لأ، باقيلي المسيح بقلبي، بالرغم مِن إنّو النار أكَلِت كلّ شي وشوَّهِتلي جسمي بسّ ما قِدرِت توصَل لإيماني... الربّ قال :
«أنا ما بهملَك ولا بِتِركَك».
وكَمَّل الرِجّال وقال :
«أنا فَقَدِت كِلّ شي إنَّما بِقْيِت ثِقَتي برَبنا كبيرة وأكتَر مِن هَيك زادِت».
الزوّادة بتقلّي وبتقلَّك :
«ما تِحزَنو بالصعاب والشدائد إنَّما وثَقو بالربّ وبِقُدرتو يَلّي بتَعمِل العجايب، ما تِتِركو تران الحياة يتوقَّف عند محطِّة اليأس، إنَّما احتُفظو دايماً بتذكرة الأمل !» والله معك.
المصدر : صوت المحبّة
