الله معك...
بيخَبّروا عن شاب صيني كان عِندو حلم إنّو يمشي بطريق الكمال.
بيروح لعند أحَد حُكماء الصّين وبيِسألو :
«شو لازِم أعمِل لحتَّى إمشي على طريق الكمال؟»
جاوَبو الرجّال الحَكيم بكِلّ روِيِّة :
«راقِب أفكارَك لأنّها رَح بتصير كلِماتَك، وراقِب كَلِماتَك لأنها رح بتصير أفعالَك، راقِب أفعالَك لأنّها رَح تتحَوَّل لعادات، راقِب عاداتَك لأنّها رَح بتكَوِّن شخصِيّتَك، وراقِب شَخصيّتَك لأنها الوحيدِة يَلّي رَح تِرسِملَك طَريقَك ومُستَقبَلَك.
الزّوّادة بتقلّي وبتقلَّك :
الحياة جِهِد يَومي، عَمَل مُتواصِل بِلا كَلَل ومَلَل، أوعا تِستَسلِم للقَول يَلّي بيقول : يَلّي في عَندو عادِة بالبَدَن ما بيغَيِّرا إلّا الكَفَن.
اتِّكِل على الربّ بَلِّش غَيِّر حياتَك وتذَكَّر إنّو القداسِة جِهِد يَومي، والله معك.
المصدر : صوت المحبّة
